السلام عليكم
ان شاء الله تكون بخير و في صحة جيّدة
كأس قهوتك و الورقة و الستيلو خاترك بش تستحقهم اليوم , مع مكان هادئ بش تركّز معايا و تخرج بشوي معلومات جديدة ,
معلومات بش تفيدك في حياتك الكلّ المرّة هذه مش كان محبّي التعدين و الكريبتو بش يستفادو.
قوانين الفيزياء في الكون , تفرض أنّه لكلّ فعل "ردّة فعل" , كبيرة صغيرة واضحة غير واضحة عرفناها و حسّيناها او حتى معرفناهاش
الحركة نتيجتها حاجتين , تعطي منتوج , و تترك مخلّفات
المنتوج هي النتيجة لي حاشتك بيها انت
المخلّفات هي النتيجة غير المرغوب فيها للحركة , و لي كان متعرفش تتعامل معاها راهي تنجّم تحرمك من المنتوج بشكل ابدي او مؤقّت
من القرن 18م و البشريّة تجتهد بش تنتج حاجة 'تلطّف و تبرّد و تجمّد' اشياء معيّنة لهدف معيّن
في بداية القرن 20 تصنع اول مكيّف , و لي كان وقتها انتاجه محدود , ثم كي تضخّم الطلب عليه اصبح يتصنّع و يشريوه كان "les gens bien"
الطبقة البورجوازيّة و ما فوقها من طبقات الملوك و الاثرياء
الفئة العالية من الغرافيك كارد أغلبهم فيهم 3 مراوح تعمل باستمرار لتبريد الـ Heat Sink
الـ Heat Sink هذا ببساطة هو مشتّت للحرارة , حرارة ال GPU الي يتكوّن من آلاف و احيانا ملايين الترانزيستورات
و مشتت حرارة لحاجة اخرى ما يعرفوهاش برشا ناس , الي هي ال VRAM
VRAM ببساطة "الرام تع الغرافيك كارد" , مكان التخزين المؤقّت للبيانات الرسوميّة و الحسابيّة , خاتر الغرافيك كارد مهيش ادات تع "افيشاج" و بس
اقوى المعادلات الحسابيّة في الكون يتمّ ادائها بالغرافيك كارد و ليس بالبروسيسور العادي
حتى اقوى بروسيسورات Xeon و Ryzen Threadripper متنجمش تنافس غرافيك كارد من الفئة المتوسطة
VRAM هو حاجة كل ما زاد حجمها كلّ ما كان أداء المعالجة الرسوميّة في الحاسوب Smooth , و هي الحاجة لي يحبوها برامج التصاميم و الانتاج الضخمة , كيف 3ds max - Autocad - CorelDraw - Revit - AfterEffect ...
التعدين يعتمد أساسا على الـ Architecture المتقدمة متع الـ VRAM و سرعة ترددها , و مش بالضرورة ياسر 'الحجم'
مثلا rtx3060 فيها 12Go VRAM , و 3080 فيها كان 10Go VRAM
و طبعا لا مقارنة بيناتهم , ال 3060 هو غرافيك كارد من الفئة المتوسّطة و 3080 من الفئة العالية
الـ VRAMاثناء التعدين بش يعمل مجهود كبير ياسر كعنصر منتج , و بدرجة اقل منه بياسر ال GPU
المجهود هذا يتّرجم على ارض الواقع لزوز نتائج :
منتوج : مرابيح التعدين
مخلفات : استهلاك مرتفع للكهرباء + حرارة مرتفعة تنتجها الغرافيك كارد بشكل عام
استهلاك الكهرباء الحل متاعه هو ال Panneaux Photovoltaïques و بس.
الحرارة المرتفعة , ليها حلول متنوعة :
1- الزيادة في سرعة المراوح
2- استعمال مراوح خارجية
3- استعمال المكيّف في الغرفة
انسان عنده 1-2-3 غرافيك كارد للتعدين , لا داعي ابدا للتفكير في مكيّف , مهما كان نوع و فئة الغرافيك كارد الي يعدّن بيهم , المكيّف في الحالة هذه هو ميزاب خسائر من جيبك , تكفيك بعض المراوح الخارجيّة
مروحة كهربائيّة او مراوح 120-140 mm تركب في الـ motherboard ساهل برشا بش تصنعلهم support صغير في الكوارط
انسان عنده اكثر من 4 غرافيك كارد , المكيّف حاجة لازمة في حرارة الصيف , حتى كي تسكن في دار حجر , مع سخانة 40د في الخارج بش تسخن الدار
الزيادة في سرعة مراوح الغرافيك كارد , حاجة ما ننصحش بيها ابدا , استعمل تبريد خارجي و مراوح خارجيّة دائما افضل من الزيادة الكبيرة في سرعة مراوح الغرافيك كارد , علاش ؟
ارجع للموضوع هذا تو تعرف :
اقرا ايضا Important Mining Tips نصائح مهمة في الماينينغ 2022 نجيو للّي حاشتنا بيه تو , انسان يستعمل المكيّف , هل المسألة مربحة و مجدية ؟
الكليماتيزور كي تشريه بش تلقا فيه fiche technique لاصقة في ظهر ال Unité intérieur
موجود عليها المعلومات الخاصة بالمكيف متاعك الكلّ , المودال - السعة - استهلاك الكهرباء - الوزن ....
لي يهمنا في هذا الكل هو : Power Input
ناخذو مثال شنفهمو بيه الهدرة كاملة , مكيّف السعة متاعه 12000BTu , الي هي متعارف عليها في بلادنا " 12 mille "
على افتراض انه الـ Power Input متاعه مكتوب عليها 1200 W
يعني سي الكليم هذا يستهلك في 1200 واط في الساعة الواحدة في حال قعد يخدم بشكل مستمرّ بدون انقطاع , طبعا لو محطوط في درجة تبريد معتدلة (25-26)
لأنه 1200 واط هي متوسّط معدّل الاستهلاك قياسا مع الكهرباء الداخلة للمكيّف و مهياش رقم دقيق جدّا
1200 واط يعني لو المكيّف يخدم لمدّة 24 ساعة بدون انقطاع , بش يكون عندنا المعادلة التالية :
1200 * 24 = 28800 W
يعني استهلاك يومي قيمته 29 Kw
سجل عند الرقم هذا , 29 كيلو ضو في اليوم بمعدل عمل 24/24
نتعداو لشخص عنده 5 غرافيك كارد , الكلهم rx6800 كيف ما خذيناهم في موضوعنا هذا بش تكون المواضيع متناسقة :
الإستثمار في الماينينغ : إصنع بنفسك ريغ-جهاز تعدين كامل من الصّفر وصولا إلى مرحلة التعدين
بعد كسر السرعة الخاص بالـ VRAM للغرافيك كارد AMD RX6800 , بش نتحصلو على معدل Hashrate اعلى من 61 , و ممكن يوصل حتى 64 ببعض التعديلات , و كيما موجود في الصورة ادناه في مربّع الـ Powr, فإنه الاستهلاك تع الكهرباء للبطاقة الواحدة بش يكون 127W في الساعة , و لي نجمو نخفضوه حتّى ل 123W لو نقومو ببعض التعديلات في كسر السرعة.عندنا 5 بطاقات , يعني 5* 127= 635W
صديقنا صاحب البطاقات هذه يحب يشغّلهم لمدّة 24 ساعة في اليوم , يعني معدّل الاستهلاك بش يكون 635* 24 = 15240W
يعني تقريبا 15 كيلو و 240 واط في اليوم بمعدل عمل 24/24
و بش يكون عندنا بطبيعة الحال معدل تع استهلاك للحاسوب خاتر الحاسوب يستهلك زادا مفماش كان الغرافيك كارد يخدمو فيه ,استهلاك الحاسوب يرجع يقوّة و كفاءة القطع لي فيه , يعني مثلا بروسيسور اقتصادي i3 استهلاكه بعيد ياسر على استهلاك Ryzen 7-9.
خلينا نقولو 50W في الساعة كحد اقصى بالنسبة لكلّ الحاسوب , يعني 50W * 24 = 1200W , يعني 1 كيلو و 200 واط في اليوم بمعدل عمل 24/24
نجيو لحساب الاستهلاك النهائي بالواط :
28800 + 15240 + 1200 = 45240 W
يعني صديقنا عنده ما يقارب 45 كيلو واط استهلاك للكهرباء يوميا , هذا رقم كبير و مهوش هيّن أبدا
معدل الاستهلاك الشهري بش يكون 45*30= 1350 Kw
و بما انه فاتورة الكهرباء بش تكون مرة كل شهرين , فالاستهلاك تقريبا بش يكون 1350 *2 = 2700 Kw
نمشيو تو لموقع STEG وين نلقاو السيمولاتور لي عاملاته الستاغ (حاجة هايلة و دقيقة جدّا و عن تجربة عدّة مرّات) بش كل واحد ياخو حقّه
Simulateur STEG
بش نحطو الاستهلاك متاعنا و نطلعو قداش بش تجينا الفاتورة :
1- تلقاها في فاتورة الضو متاعك تحت كلمة : Libellés , اختار الموجود في فاتورتك , و لي هو في الحالة تع المنزل العادي يكون دائما Compteur Eclairage
2- مدة الاستهلاك , حطها شهرين
3- الاستعمال , منزلي لو المكينة تخدم فيها في دار , و حط غير منزلي لو في مصنع او شركة , لانه حساب الفاتورة مختلف تماما بيناتهم
4- معدل الاستهلاك الشهري بالكيلواط لي حسبناه (حط معدل الاستهلاك الخاص بيك)
5- قوّة الكهرباء و التدفق , كل شخص يعرف داره قداش مدخللها , في المنازل العادية عادة ما تكون 2Fils - 10A-15A-20A
6- بعد ادخل المعلومات الكلّ , ننزلو على Simulez , بش تجينا الفاتورة متاعنا هذه :
أي هاو شرح كامل للفاتورة بش توضاح الامور و نحاول نبسّط المعلومة للناس الكلّ , الارقام لي بش نشرحها هي نفسها الموجودة في الصورة , يعني الشرح 1 هو للرقم 1 المكتوب بالازرق على الصورة وين الاسهم :
خلّيني نوضح حاجة , و لو انه اغلب التوانسة يعرفوها اما ميسالش نذكرو بيها , ثمن كيلو الكهرباء مهوش حاجة "ثابتة" , يعني مثلا , كي تستهلك انت 2700 كيلواط كيف حالتنا هذه , ثمن الكيلو رقم 1 مهوش هو نفسه ثمن الكيلو الاخير , و هاو في شرح الفاتورة بش نفهموه اكثر :
1- هو الـ Tranche 1 , و لي قدامه 400 تحت خانة الاستهلاك , والمقصود بيه بالضبط "أوّل 400 كيلواط تم استهلاكهم" , سعر الكيلو متاعهم تلقاه مباشرة قدّامه في خانة السّعر لي هو 0.181 يعني 181 ملّيم/كيلو , و بعمليّة حسابيّة بسيطة بش نلقاو المبلغ الكامل تع أوّل 400 كيلواط استهلاك , و لي بش يكون 181 * 400 = 72.400د
2- هو الـ Tranche 2 , و لي قدامه 200 تحت خانة الاستهلاك , و المقصود بيه بالضبط "ثاني 200 كيلواط تم استهلاكهم" , سعر الكيلو متاعهم تلقاه مباشرة قدّامه في خانة السّعر لي هو 0.223 يعني 223 ملّيم/كيلو , و بعمليّة حسابيّة بسيطة بش نلقاو المبلغ الكامل تع ثاني 200 كيلواط استهلاك , و لي بش يكون 223 * 200 = 44.600د
3- هو الـ Tranche 3 , و لي قدامه 400 تحت خانة الاستهلاك , و المقصود بيه بالضبط "ثالث 400 كيلواط تم استهلاكهم" , سعر الكيلو متاعهم تلقاه مباشرة قدّامه في خانة السّعر لي هو 0.346 يعني 346 ملّيم/كيلو , و بعمليّة حسابيّة بسيطة بش نلقاو المبلغ الكامل تع ثالث 400 كيلواط استهلاك , و لي بش يكون 346 * 400 = 138.400 د
4- هو الـ Tranche 4 , و لي قدامه 1700 تحت خانة الاستهلاك , و المقصود بيه بالضبط "رابع 1700 كيلواط تم استهلاكهم" , سعر الكيلو متاعهم تلقاه مباشرة قدّامه في خانة السّعر لي هو 0.419 يعني 419 ملّيم/كيلو , و بعمليّة حسابيّة بسيطة بش نلقاو المبلغ الكامل تع رابع 1700 كيلواط استهلاك , و لي بش يكون 419 * 1700 = 712.300
5- هو الاستهلاك الجملي متاعنا , او متاع صديقنا مولا الكوارط الي حكينا عليه في البداية و تلّفناه من بعد هههه
الاستهلاك الكامل للكهرباء هو في خانة "مجموع الاستهلاك و لي قيمته 970.500 د
البقية كيما تشوفو , معلوم الاذاعة و التلفزة و أداء على القيمة المضافة , بش نتحصلو في النهاية على مبلغ تقديري للفاتورة و لي هو 1.102.078د
الفاتورة متاعنا فيها مليون و 102 , لي هي استهلاك شهرين في التعدين
السؤال المهمّ تو لي يدور في بالك , صديقنا خاسر والا رابح كي تجيه فاتورة كيف هكّا ؟؟؟!
و الجواب هو , الجواااب هو , هو لي نحطّو فيه ورقة و نبعثوها عبر البريد التونسي
لا بالحق اخطانا من الفدلكة , الجواب هو الاجابة على السؤال المطروح , نسميوه جواب
حسيتها ماسطة هذه , مش مشكل
الجواب هو أنّنا نمشيو لموقع nicehash لحساب المدخول الكامل للتعدين حسب المعدات لي شاريها صديقنا , وقت الجدّ تو عاد
ندخلو لرابط حاسبة مدخول التعدين :
Nicehash Profitability calculator
شرحتها في موضوع فارط , اما بش نعاود بش يكون الموضوع واحد و شامل للربح و الاستهلاك و المصاريف و منرجعولوش بإذن الله
1- العملة لي تحب تعرف بيها مداخيل التعدين الخاصة بك
2- ثمن الكيلواط بالعملة لي اخترتها (في حالتنا بش نخليوها 0)
3- عدد البطاقات المستعملة
4- نوع الجهاز لي تعدّن بيه (مش بالضرورة غرافيك كارد) هذا علاش قلنا جهاز
5- كان عندك مودالات اخرين او اجهزة اخرى اخرى تعدن بيهم
النتيجة بش تكون :
1- المدخول الكامل
2- سعر الكهرباء المستهلك (هو 0 عندنا لأننا حطينا سعر الكهرباء صفر)
3- الربح الصافي
4- النتائج باليوم-الاسبوع-الشهر
الآن و في وقت كتابة هذا الموضوع بتاريخ 29-09-2021 , المدخول بش يكون 610$ شهريّا و لي هو مبلغ "تقريبي" و ليس دقيق أبدا , يزيد و ينقص حسب مداخيل التعدين , و لي هي في ليلة و نهار تنجم تطلع او تهبط , و هذا راجع لبرشا عوامل ذكرتهم في مواضيع فارطة.
المهمّ , صديقنا يحب يبيع فلوسه تو , لو حسبنا البيع بش يكون بثمن البنك لي هو تقريبا 2.8د للدولار , يعني بش نتحصلو على 610 * 2.8 = 1708 دينار شهريا
حساب شهرين هو : 1708 *2 = 3416 دينار
معلوم الكهرباء للشهرين هو 1102 دينار , يعني الربح الصافي سيكون : 3416 - 1102= 2314 دينار في شهرين
هذا يكون فقط بين اشهر جويلية-اوت-سبتمبر , باقي الاشهر مش بش يكون فمّا استهلاك للمكيّف ابدا , يعني الربح سيكون أكثر بحذف ثمن كهرباء المكيّف , لي هو اكثر من 50% من ثمن الفاتورة
و عاود احسب وحدك أتاو تعرف انّه بدون مكيّف الربح خير بياسر بش يكون باذن الله
هذه فلوس التعدين هاهي قدّامكم , عطيتكم Barème تقريبي يخلّيكم تحسبو أيّ إستهلاك لأيّ آلات تعدين مهما زادت أو نقصت , لو مفهمتش الموضوع عاود أقراه تو تفهم مفمّا حتّى شيء صعيب فيه أبدا
عمليّات حسابيّة سهلة و بسيطة , شويّة منطقيّة في فهم المصطلحات و التدرّج في التحليل و الفهم يخلّيك تفهم كلّ شيء في الحياة , مهما كنت ترا انّه صعيب و معقّد يولّيلك بسيط جدّا
عرفتو أكا لي خارج من الدّار و عارف روحه نسى حاجة , انا هكّا تو , ناسي حاجة شنقوللكم عليها و مش عارف شنيّة
ايوه , قوانين الفيزياء لي حكيت عليها في البداية , تفرض على المعدّن بش ينتقي الحلّ المناسب لتبريد المعدّات متاعه و خاصّة الاعتناء بتنظيفها جيّدا كلّ مدّة و عدم اهمالها كيما ذكرنا في موضوع سابق
الاهمال هو فعل , و ردّة الفعل متاعه هي المخلفات الكارثيّة , مخلفاته احيانا تكون "مدمّرة" , من قبيل "الماتريال يتحرق" و تخسره إلى الابد ربّما
لهذا الحذر ثمّ الحذر في التعامل مع المعدّات الثمينة , إلّي جاء بالصّعيب متخليهش يمشي بالسّاهل بالاستهتار و اللامبالات والتسويف
نشوفكم في موضوع آخر ان شاء الله
تعليقات
إرسال تعليق